ग्रामीण भागातील विद्यार्थ्यांनी जिद्द व आत्मविश्वास जोपासावा ः गुगळे

नगर । प्रतिनिधी - कठीण व अडचणींच्या परिस्थितीशी सामना करण्याची वेगळी ताकद व उर्मी ग्रामीण भागातील विद्यार्थ्यामध्ये असतेच. त्यामुळे अशा मुलांनी जिद्द व आत्मविश्वास जोपासले तर ते यशस्वी होतील, असे मत एमआयआरसी व एसीसी अ‍ॅडचे फायनान्स अ‍ॅडव्हायजर धीरज गुगळे यांनी व्यक्त केले.

आयएमएसमध्ये आयोजित आग्नेयम 2019 आंतरमहाविद्यालयीन स्पर्धेचा पारितोषिक वितरण सोहळा धीरज गुगळे यांच्या हस्ते झाला. यावेळी ते बोलत होते.याप्रसंगी आयएमएसचे संचालक डॉ. एस. बी. मेहता, व्यवस्थापन विभाग प्रमुख डॉ. मीरा कुलकर्णी उपस्थित होते. या स्पर्धेत संगमनेर कॉलेजने सांघिक विजेतेपद मिळविले.

आग्नेयम स्पर्धेचा शुभारंभ संचालक डॉ. एम. बी. मेहता यांच्या हस्ते दीपप्रज्वलनाने करण्यात आला. प्रास्ताविकात डॉ. मीरा कुलकर्णी म्हणाल्या, दरवर्षी विद्यार्थी आग्नेयम स्पर्धेची उत्सुकतेने वाट पाहतात. यावर्षी 18 महाविद्यालयातील 626  विद्यार्थ्यांनी विविध स्पर्धांत सहभाग घेतला. विविध अशा 8 प्रकारात ही स्पर्धा घेण्यात आली. मान्यवरांच्या हस्ते विजेत्यांना पारितोषिके देण्यात आली.सांघिक विजेतेपद चषक व दहा हजार रुपये संगमनेर कॉलेजने (संगमनेर) मिळविले. व्यावसायिक प्रश्नमंजुषा स्पर्धेत अतुल कुमार व कमलजीत सिंग (अहमदनगर कॉलेज बी. ए. विभाग) हे विजयी तर नरेंद्र देशपांडे व दुर्गेश भाबड (संगमनेर कॉलेज) उपविजयी ठरले. फेस पेंटिंग स्पर्धेत मानसी बोकरीया व ऋतिका अवताडे (रमेश फिरोदिया कॉलेज ऑफ आर्किटेक्टचरर्स) विजयी तर कोमल कोलते व देवशिष खांडेकर (यशवंतराव चव्हाण डेंटल कॉलेज) हे उपविजयी झाले. कोलाज स्पर्धेत नेहल तलवार व भाग्यश्री शिंदे (न्यू आर्टस कॉलेज, अ. नगर) विजयी तर उपविजती वैष्णवी जायले, कांचन जैस्वाल, प्रतीक्षा काकडे, निकिता जे (यशवंतराव चव्हाण डेंटल कॉलेज) हे झाले. मॉक प्रेस स्पर्धेत मंगेश वाघमारे (संगमनेर कॉलेज) विजयी तर दिपाली वारे (रमेश फिरोदिया आर्ट, सायन्स अ‍ॅण्ड कॉमर्स कॉलेज, साकुर) उपविजयी झाली. अ‍ॅड मॅड शो स्पर्धेत गणेश आकाश व टीम, प्रोडक्ट्स ब्रूम (प्रवरा कॉलेज ऑफ फार्मसी, लोणी) विजयी तर मंगेश अक्षय व टीम, प्रोडक्ट कॅमेरा (संगमनेर कॉलेज) हे उपविजयी झाले. गायन स्पर्धेत संकेत रामडे (न्यू आर्टस कॉलेज, नगर) व सागर जीवार (रमेश फिरोदिया आर्ट, सायन्स अ‍ॅण्ड कॉमर्स कॉलेज, साकुर) हे विजयी तर अनुजा सराफ (संगमनेर कॉलेज) व अनुराग ढगे (विश्वकर्मा कॉलेज) हे उपविजयी झाले. एक्स टेम्पो स्पर्धेत अक्षय उगले (संगमनेर कॉलेज) विजयी झाला तर रेवनाथ सुतार (अभिनव कॉलेज, अकोले) हा उपविजयी ठरला. ग्रुप  डान्स स्पर्धेत अभिनव कॉलेज ऑफ सायन्स, अकोला संघ विजयी तर रमेश फिरोदिया आर्ट, सायन्स अ‍ॅण्ड कॉमर्स कॉलेज, साकुरचा संघ उपविजयी ठरला.

सूत्रसंचालन आयएमएसच्या विद्यार्थ्यांनी केले. आभार प्रा. डी. ए. कुलकर्णी यांनी मानले. कार्यक्रम यशस्वीतेसाठी प्रा. डॉ. विक्रम बार्नबस, प्रा. मनोज कुलकर्णी, आयएमएसचे प्राध्यापक, कर्मचारी व विद्यार्थ्यांनी विशेष परिश्रम घेतले.