नगर । प्रतिनिधी - संत निरंकारी चॅरिटेबल फाऊंडेशनच्या नगर शाखेच्यावतीने विद्यमान निरंकारी सद्गुरु माता सुदीक्षाजी महाराज यांच्या प्रेरणेने सद्गुरू बाबा हरदेवसिंहजी महाराज यांच्या 65 व्या जयंतीचे औचित्य साधून येथील सिव्हील हॉस्पिटलच्या परिसरात विशेष स्वच्छता मोहीम राबविण्यात आली. यावेळी निरंकारी सेवादलच्या महिला व पुरुष सदस्य तसेच चॅरिटेबल फाऊंडेशनच्या स्वयंसेवकांनी एकत्रितपणे सिव्हीलचा संपूर्ण परिसर झाडलोट करुन धुवून-पुसून स्वच्छ केला. यात 200 हून अधिक स्वयंसेवक, अनुयायी नि:स्वार्थ भावनेने सहभागी झाले होते.
सकाळी 8 वाजता सिव्हील हॉस्पिटलच्या बाह्यरुग्ण विभागजवळ सर्वजण एकत्र आले. सामूहिक प्रार्थना म्हणत तसेच सद्गुरु माता सुदीक्षा सविंदर हरदेवजी महाराज यांचा जयघोष करीत सफाई अभियानाला सुरुवात करण्यात आली. सफाई अभियानाच्या उद्घाटनप्रसंगी महापौर बाबासाहेब वाकळे, नगरसेवक मिलिंद गंधे, नगरसेवक अक्षय उनवणे, सिव्हीलचे डॉ. घुगे, डॉ. कटारिया, आशा गायकवाड, स्वच्छताधूत मनोहर खुबचंदानी, सुरेश जाधव, निरंकारी मंडळाचे झोनल इन्चार्ज हरिश खुबचंदानी, निरंकारी सेवादल संचालक आनंद कृष्णानी, अनिल टकले यांच्यासह इतर मान्यवर उपस्थित होते.
सकाळी 8 वा. सुरु झालेले साफसफाई अभियान दुपारी 12 वाजेपर्यंत अखंडपणे राबविण्यात आले. या अभियानात स्वयंसेवकांनी सिव्हील हॉस्पिटलचे प्रवेशद्वार, सिव्हीलचा मागील परिसर, नेत्रकक्ष परिसर, क्षयरोेग इमारत जवळील परिसर, लेबर वॉर्डमागील परिसर, प्रशिक्षण इमारत जवळील परिसर, शवविच्छेदन कक्षाबाहेरील परिसर, पार्किंगचा परिसर आदी ठिकाणी विशेष साफसफाई केली. याठिकाणी मोठ्या प्रमाणात कचरा गोळा करुन कचरा गाड्यांमध्ये भरुन दिला. सिव्हीलच्या बाह्यरुग्ण विभागाचा दर्शनी भाग महिला सेवादलने पाण्याने स्वच्छ धूऊन काढला. एकंदरीत सर्व स्वयंसेवकांनी नियोजनबद्ध शिस्तीने, तन्मयतेने, नि:स्वार्थ भावनेने सफाई अभियान राबविल्यामुळे सिव्हीलचा कोपरा न कोपरा चकाचक दिसत होता.
असेच विशेष सफाई अभियान चॅरिटेबल फाऊंडेशनच्यावतीने आजच अर्थात 23 फेब्रुवारी रोजी 8 ते 12 यावेळेत देशभरातील 350 शहरातील 765 सरकारी रुग्णालयांत राबविण्यात आल्याचे मंडळाचे प्रसिद्धी प्रमुख किशोर खुबचंदानी यांनी सांगितले.
No comments:
Post a Comment