‘सुधारणा पुनर्वसन’ यानुसार आयुष्यात देखील सुधारणा व्हाव्यात

नगर । प्रतिनिधी - मनुष्य आपल्या जीवनामध्ये अनेक घटनांमधून जात असतो. लहानपणी एखादी चूक झाली तर आई आपल्या पाठीवर एखादा फटका मारते, हा एक शिक्षेचाच प्रकार असतो, थोडे अजून मोठे झाल्यावर जेव्हा आपल्या पालकांना आपल्याला मारणे योग्य वाटत नसेल तर आपल्याला समजावून सांगतात. त्याचप्रमाणे शालेय जीवनात देखील काही चुका झाल्यास शिक्षक आपल्याला शिक्षा म्हणून काही जास्तीचे लिहून आणायला सांगतात, पाठांतर सांगतात हा देखील एक शिक्षेचाच प्रकार असतो आणि त्याचा उद्देश देखील तेवढाच स्पष्ट असतो की, आपण केलेल्या कृत्याबद्दल आपल्याला जाणीव व्हावी, पश्चाताप व्हावा. अशाच प्रकारच्या सुधारणांचा उद्देश ठेवूनच कारागृहात देखील आपल्यासाठी यासर्व नियमांची कार्यवाही केली जाते. करागृहाचे ब्रिदवाक्य ‘सुधारणा पुनर्वसन’ यानुसार आपल्या भावी आयुष्यात देखील आपल्यामध्ये काही सुधारणा व्हाव्यात, असे आपल्याला वाटत असेल तर निश्चितपणे आपल्यासाठी कारागृहात ज्या सोयीसुविधा उपलब्ध करुन दिल्या आहेत, त्याचा यथायोग्य वापर करुन घेतला पाहिजे, असे प्रतिपादन प्रमुख जिल्हा व सत्र न्यायाधीश कमलाकर कोठेकर यांनी केले.

   जिल्हा कारागृहातील बंदी जणांसाठी जिल्हा विधी व सेवा प्राधिकरण, अहमदनगर यांच्या माध्यमातून कायदे विषयक जनजागृती शिबीर आयोजित करण्यात आले होते. याप्रसंगी न्यायधीश कोठेकर बोलत होते. कार्यक्रमास जिल्हा विधी सेवा प्राधिकरण सचिव न्यायाधीश पद्माकर केस्तीकर, न्यायाधीश जी.जी.इटकळकर, न्यायाधीश श्रीमती एस.पी.केस्तीकर, न्यायाधीश एच.एस.सातभाई, प्राधिकरणचे सदस्य अ‍ॅजड.प्रशांत मोरे, कारागृह अधिक्षक एन.जी.सावंत, वरिष्ठ तुरुंग अधिकारी शामकांत शेडगे आदि उपस्थित होते. याप्रसंगी बोलतांना न्यायधीश श्रीमती एस.पी. केस्तीकर यांनी  गुन्ह्याच्या ‘प्ली बार्गेनिंग’ विषयावर मार्गदर्शन करुन गुन्ह्यातून लवकर मुक्त होण्यासाठी जर बंदी जणांनी गुन्हा कबूल केल्यास संबंधीत गुन्ह्यात तडजोड करुन 7 वर्षाखालील गुन्ह्यांमध्ये आर्धी किंवा त्यापेक्षा कमी शिक्षा होऊन लवकरात लवकर कारागृहातून सुटण्यास मदत होणार असल्याचे सांगितले. न्यायाधीश सातभाई म्हणाले, कारागृहाबाहेर असताना आपले जे अधिकार आहेत, त्यावर थोडी पाबंदी कायद्यानुसार येते. कारागृहात आल्यावर सर्वच अधिकार काढून घेतले जात नसून, कायदा व सुव्यवस्था राखण्यासाठी काही नियम लागू केले जात  आहेत. प्राधिकरणचे सचिव पद्माकर केस्तीकर यांनी ‘कायदेविषयक जनजागृती शिबीर’ची प्रस्तावना केली. अ‍ॅड.प्रशांत मोरे यांनी शिक्षा, बंदी जणाची रजा, पॅरोल, फर्लो, डेथ पॅरोल, नातेवाईकांची मुलाखत, वैद्यकीय सुविधा अशा अनेक अधिकारांची माहिती देऊन मार्गदर्शन केले.  कार्यक्रमाचे सूत्रसंचालन अधिक्षक शामकांत शेडगे यांनी केले तर आभार कारागृह अधिक्षक एन.जी.सावंत यांनी केले. या कार्यक्रमास विधीसेवा प्राधिकरणचे अधीक्षक नगरकर, अ‍ॅड.शिरसूल, कारागृहाचे वैद्यकीय अधिकारी संजय खंडागळे व अधिकारी कर्मचारी उपस्थित होते.